ye hai jaan-e-bahaar ka aalam

ye hai jān-e-bahār kā 'ālam

jaise gul ke nikhār kā 'ālam

jaise chhilke hue hoñ paimāne

yaad hai chashm-e-yār kā 'ālam

dekhne vaale ḳhaak dekheñge

us dil-e-be-qarār kā 'ālam

band hotī nahīñ hai chashm-e-shauq

ab ye hai intizār kā 'ālam

lab the ḳhāmosh ab haiñ nauha-kunāñ

vo ḳhizāñ ye bahār kā 'ālam

phuul ne khilkhilā ke dikhlāyā

lab-e-rañgīn-e-yār kā 'ālam

ham to 'bahzād' kho ga.e yaksar

kaisā pyārā hai pyaar kā 'ālam

ye hai jaan-e-bahaar ka 'alam

jaise gul ke nikhaar ka 'alam

jaise chhilke hue hon paimane

yaad hai chashm-e-yar ka 'alam

dekhne wale KHak dekhenge

us dil-e-be-qarar ka 'alam

band hoti nahin hai chashm-e-shauq

ab ye hai intizar ka 'alam

lab the KHamosh ab hain nauha-kunan

wo KHizan ye bahaar ka 'alam

phul ne khilkhila ke dikhlaya

lab-e-rangin-e-yar ka 'alam

hum to 'bahzad' kho gae yaksar

kaisa pyara hai pyar ka 'alam