kya ye bhi main batla dun tu kaun hai main kya hun

kyā ye bhī maiñ batlā duuñ tū kaun hai maiñ kyā huuñ

tū jān-e-tamāshā hai maiñ mahv-e-tamāsha huuñ

tū bā'is-e-hastī hai maiñ hāsil-e-hastī huuñ

tū ḳhāliq-e-ulfat hai aur maiñ tirā banda huuñ

jab tak na milā thā tū ai fitna-e-do-'ālam

jab dard se ġhāfil thā ab dard kī duniyā huuñ

kuchh farq nahīñ tujh meñ aur mujh meñ koī lekin

tū aur kisī kā hai be-dard maiñ terā huuñ

muddat huī kho baiThā sarmāya-e-taskīñ maiñ

ab to tirī furqat meñ din raat taḌaptā huuñ

armān nahīñ koī go dil meñ mire lekin

allāh rī majbūrī majbūr-e-tamannā huuñ

'bahzād'-e-hazīñ mujh par ik kaif sā taarī hai

ab ye mirā 'ālam hai hañstā huuñ na rotā huuñ

kya ye bhi main batla dun tu kaun hai main kya hun

tu jaan-e-tamasha hai main mahw-e-tamasha hun

tu ba'is-e-hasti hai main hasil-e-hasti hun

tu KHaliq-e-ulfat hai aur main tera banda hun

jab tak na mila tha tu ai fitna-e-do-'alam

jab dard se ghafil tha ab dard ki duniya hun

kuchh farq nahin tujh mein aur mujh mein koi lekin

tu aur kisi ka hai be-dard main tera hun

muddat hui kho baiTha sarmaya-e-taskin main

ab to teri furqat mein din raat taDapta hun

arman nahin koi go dil mein mere lekin

allah ri majburi majbur-e-tamanna hun

'bahzad'-e-hazin mujh par ek kaif sa tari hai

ab ye mera 'alam hai hansta hun na rota hun