وہ صورت جو دل میں اتر جائے گی

وہ صورت جو دل میں اتر جائے گی

محبت کی دنیا سنوار جائے گی

کہاں تک سہوں گا میں آلام غم

گذرتے گذرتے گذر جائے گی

مرے بعد کیا ہوگا تیرا مآل

مری بے بسی تو کدھر جائے گی

ذرا دل کو مانوس غم کر تو لوں

کلی جب کھلے گی نکھر جائے گی

کسی دن یہ آنسو بھی تھم جائیں گے

جو ندی چڑھی ہے اتر جائے گی

ان آہوں کا کچھ اورمقصد نہیں

کسی بے خبر کو خبر جائے گی

حقیقی ہے بہزادؔ عالم میرا

مری آہ کیوں بے اثر جائے گی