عشق جب سے دل کو کیف بے اماں دینے لگا

عشق جب سے دل کو کیف بے اماں دینے لگا

سر کو لذت اور سنگِ آستاں دینے لگا

میں تو مانوس الم تھا اف یہ مجھ کو کیا ہوا

اب تو میرا غم بھی مجھ کو تلخیاں دینے لگا

اس طرح محروم نالہ دیکھتے ہیں چشم دوست

جیسے کوئی بے زبانوں کو زباں دینے لگا

اللہ اللہ ان کے آتے ہی قیامت آ گئی

یعنی اک لمحہ حیاتِ جاوداں دینے لگا

رہروی میں میری قسمت کا کرشمہ دیکھیے

راہزن خود مجھ کو منزل کا نشاں دینے لگا

میکدے میں میرے ساقی کا کرم تو دیکھنا

جام کے بدلے مجھے بے تابیاں دینے لگا

میں گدا اس کا ہوں اے بہزادؔ جو دست کرم

بے طلب مجھ کو متاعِ دو جہاں دینے لگا