hai muKHtalif jahan se meri zindagi ka rang

hai muḳhtalif jahāñ se merī zindagī kā rañg

yā'nī ki ġham meñ Duub gayā hai ḳhushī kā rañg

bād-e-sabā se kah do hushiyār ho ke aa.e

chhāyā huā hai sahn-e-chaman par kalī kā rañg

aksar maiñ sochtā huuñ qayāmat bapā na ho

un par asar kare na merī sādgī kā rañg

ab tire dar ko hai mire sajdoñ kī aarzū

ai bandagī navāz ye hai bandagī kā rañg

piitā huuñ aur hosh se jaatā nahīñ huuñ maiñ

saaqī ko hai pasand mirī mai-kahsī kā rañg

ġhunchoñ ne tum se sīkhī haiñ nāzuk adā.iyāñ

phūloñ ne le liyā hai tumhārī hañsī kā rañg

merī nigāh-e-shauq taḌaptī hai baar baar

chhāyā huā hai kaun-o-makāñ par kisī kā rañg

'bahzād' ham ko ḳhud bhī to us kī ḳhabar nahīñ

kis kī ḳhushī meñ gum hai hamārī ḳhushī kā rañg

hai muKHtalif jahan se meri zindagi ka rang

ya'ni ki gham mein Dub gaya hai KHushi ka rang

baad-e-saba se kah do hushiyar ho ke aae

chhaya hua hai sahn-e-chaman par kali ka rang

aksar main sochta hun qayamat bapa na ho

un par asar kare na meri sadgi ka rang

ab tere dar ko hai mere sajdon ki aarzu

ai bandagi nawaz ye hai bandagi ka rang

pita hun aur hosh se jata nahin hun main

saqi ko hai pasand meri mai-kahsi ka rang

ghunchon ne tum se sikhi hain nazuk adaiyan

phulon ne le liya hai tumhaari hansi ka rang

meri nigah-e-shauq taDapti hai bar bar

chhaya hua hai kaun-o-makan par kisi ka rang

'bahzad' hum ko KHud bhi to us ki KHabar nahin

kis ki KHushi mein gum hai hamari KHushi ka rang