ہے مختلف جہاں سے میری زندگی کا رنگ

ہے مختلف جہاں سے میری زندگی کا رنگ

یعنی کہ غم میں ڈوب گیا ہے خوشی کا رنگ

بادِ صبا سے کہہ دو ہوشیار ہو کے آئے

چھایا ہوا ہے صحن چمن پر کلی کا رنگ

اکثر میں سوچتا ہوں قیامت بپا نہ ہو

ان پر اثر کرے نہ میری سادگی کا رنگ

اب ترے در کو ہے مرے سجدوں کی آرزو

اے بندگی نواز یہ ہے بندگی گا رنگ

پیتا ہوں اور ہوش سے جاتا نہیں ہوں میں

ساقی کو ہے پسند مری میکشی کا رنگ

غنچوں نے تم سے سیکھی ہیں نازک ادائیاں

پھولوں نے لے لیا ہے تمہاری ہنسی کا رنگ

میری نگاہ شوق تڑپتی ہے بار بار

چھایا ہوا ہے کون و مکان پر کسی کا رنگ

بہزادؔ ہم کو خود بھی تو اس کو خبر نہیں

کس کی خوشی میں گم ہے ہماری خوشی کا رنگ