be-murawwat bewafā nā-mehrbāñ nā-āshnā

be-muravvat bevafā nā-mehrbāñ nā-āshnā

jis ke ye ausāf koī us se ho kyā āshnā

tañg ho saa.e se apne jis ko ho nā-āshnā

vo but-e-vahshī-e-tabī.at kis kā hogā āshnā

vaah vaah ai dil-bar-e-kaj-fahm yūñhī chāhiye

ham se ho nā-āshnā ġhairoñ se honā āshnā

bad-mizājī nā-ḳhushī āzurdagī kis vāste

gar bure ham haiñ to ho jiye aur se jā āshnā

ye sitam ye dard ye ġham aur alam mujh par huā

kaash ki tujh se maiñ ai zālim na hotā āshnā

ne tarahhum ne karam ne mehr hai ai bevafā

kis tavaqqo par bhalā ho koī terā āshnā

āshnā kahne ko yuuñ to aap ke hoveñge sau

par koī ai mehrbāñ aisā na hogā āshnā

ḳhair-ḳhvāh o muḳhlis o fidvī jo kuchh kahiye so huuñ

aib kyā hai gar rahe ḳhidmat meñ mujh sā āshnā

āshnā.ī kī tavaqqo.a kis se ho 'bedār' phir

ho gayā begāna jab aisā hī apnā āshnā

be-murawwat bewafā nā-mehrbāñ nā-āshnā

jis ke ye ausāf koī us se ho kyā āshnā

tañg ho sae se apne jis ko ho nā-āshnā

wo but-e-wahshī-e-tabīat kis kā hogā āshnā

wah wah ai dil-bar-e-kaj-fahm yūñhī chāhiye

hum se ho nā-āshnā ġhairoñ se honā āshnā

bad-mizājī nā-ḳhushī āzurdagī kis wāste

gar bure hum haiñ to ho jiye aur se jā āshnā

ye sitam ye dard ye ġham aur alam mujh par huā

kash ki tujh se maiñ ai zālim na hotā āshnā

ne tarahhum ne karam ne mehr hai ai bewafā

kis tawaqqo par bhalā ho koī terā āshnā

āshnā kahne ko yuñ to aap ke howeñge sau

par koī ai mehrbāñ aisā na hogā āshnā

ḳhair-ḳhwāh o muḳhlis o fidwī jo kuchh kahiye so huñ

aib kyā hai gar rahe ḳhidmat meñ mujh sā āshnā

āshnāī kī tawaqqoa kis se ho 'bedār' phir

ho gayā begāna jab aisā hī apnā āshnā