kya gila is ka jo mera dil gaya

kyā gila is kā jo merā dil gayā

mil ga.e tum mujh ko sab kuchh mil gayā

jis ko āñkheñ DhūñDhtī thiiñ pā ga.iiñ

dil ko jis kī justujū thī mil gayā

is gul-e-ra.anā ne hañs kar baat kī

ġhuncha-e-ḳhātir hamārā khil gayā

chhoḌ kar tū us ko ġhairoñ se milā

ḳhaak meñ jo terī ḳhātir mil gayā

ban ga.ī har mauj ik mauj-e-sarāb

tishna-lab jab maiñ lab-e-sāhil gayā

arz-e-hāl-e-chāk-e-dil kyūñkar karūñ

sāmne un ke gayā muñh sil gayā

ġhair hī kyā be-ruḳhī se aap kī

aaj 'bedam' bhī bahut be-dil gayā

kya gila is ka jo mera dil gaya

mil gae tum mujh ko sab kuchh mil gaya

jis ko aankhen DhunDhti thin pa gain

dil ko jis ki justuju thi mil gaya

is gul-e-rana ne hans kar baat ki

ghuncha-e-KHatir hamara khil gaya

chhoD kar tu us ko ghairon se mila

KHak mein jo teri KHatir mil gaya

ban gai har mauj ek mauj-e-sarab

tishna-lab jab main lab-e-sahil gaya

arz-e-haal-e-chaak-e-dil kyunkar karun

samne un ke gaya munh sil gaya

ghair hi kya be-ruKHi se aap ki

aaj 'bedam' bhi bahut be-dil gaya