yun gulshan-e-hasti ki mali ne bana Dali

yuuñ gulshan-e-hastī kī maalī ne banā Daalī

phūloñ se judā kaliyāñ kaliyoñ se judā Daalī

sar rakh ke hathelī par aur laḳht-e-jigar chun kar

sarkār meñ laa.e haiñ arbāb-e-vafā Daalī

ruuyā kahūñ maiñ us ko yā muzda-e-bedārī

ġhul hai ki naqāb us ne chehre se uThā Daalī

allāh-re tasavvur kī naqqāshī-o-nairañgī

jab ban ga.ī ik sūrat ik shakl miTā Daalī

saaqī ne sitam Dhāyā barsāt meñ tarsāyā

jab fasl-e-bahār aa.ī dūkān uThā Daalī

ḳhūn-e-dil-e-āshiq ke us qatre kā kyā kahnā

duniyā-e-vafā jis ne rañgīn banā Daalī

'bedam' tire girya ne tūfān uThā Daale

aur nāloñ ne duniyā kī buniyād hilā Daalī

yun gulshan-e-hasti ki mali ne bana Dali

phulon se juda kaliyan kaliyon se juda Dali

sar rakh ke hatheli par aur laKHt-e-jigar chun kar

sarkar mein lae hain arbab-e-wafa Dali

ruya kahun main us ko ya muzda-e-bedari

ghul hai ki naqab us ne chehre se uTha Dali

allah-re tasawwur ki naqqashi-o-nairangi

jab ban gai ek surat ek shakl miTa Dali

saqi ne sitam Dhaya barsat mein tarsaya

jab fasl-e-bahaar aai dukan uTha Dali

KHun-e-dil-e-ashiq ke us qatre ka kya kahna

duniya-e-wafa jis ne rangin bana Dali

'bedam' tere girya ne tufan uTha Dale

aur nalon ne duniya ki buniyaad hila Dali