dushman-e-jaan hoga wo dildar kya malum tha

dushman-e-jān hogā vo dildār kyā mā'lūm thā

hogā sūrat se mirī bezār kyā mā'lūm thā

muddatoñ ḳhūn-e-jigar khāyā talāsh yaar meñ

parda-e-dil meñ thā vo 'ayyār kyā mā'lūm thā

ham to samjhe the kareñge mujh pe ulfat kī nazar

pher deñge un kā dil aġhyār kyā mā'lūm thā

be-takalluf tum milo ġhairoñ se aur mere liye

band hoveñ rauzan-e-dīvār kyā mā'lūm thā

terī ulfat meñ rahī gardish bhī misl-e-gard-bād

daaġh uThā.e dil pe lālā-dār kyā mā'lūm thā

yak-ba-yak ho jā.eñge kHvāhān-e-jān-e-nā-tavāñ

chashm-o-abrū gesū-o-ruḳhsār kyā mā'lūm thā

ham vahī haiñ jo tirī nazroñ meñ the har dam 'azīz

ab to haiñ har taur se nā-chār kyā mā'lūm thā

thī tamannā-e-visāl ai mah-jabīñ mujh ko vale

ek bose meñ bhī hai inkār kyā mā'lūm thā

apne bīmār-e-mohabbat par the lāzim-e-iltifāt

bhūloge vo agle qaul-e-iqrār kyā mā'lūm thā

dushman-e-jaan hoga wo dildar kya ma'lum tha

hoga surat se meri bezar kya ma'lum tha

muddaton KHun-e-jigar khaya talash yar mein

parda-e-dil mein tha wo 'ayyar kya ma'lum tha

hum to samjhe the karenge mujh pe ulfat ki nazar

pher denge un ka dil aghyar kya ma'lum tha

be-takalluf tum milo ghairon se aur mere liye

band howen rauzan-e-diwar kya ma'lum tha

teri ulfat mein rahi gardish bhi misl-e-gard-baad

dagh uThae dil pe lala-dar kya ma'lum tha

yak-ba-yak ho jaenge kHwahan-e-jaan-e-na-tawan

chashm-o-abru gesu-o-ruKHsar kya ma'lum tha

hum wahi hain jo teri nazron mein the har dam 'aziz

ab to hain har taur se na-chaar kya ma'lum tha

thi tamanna-e-visal ai mah-jabin mujh ko wale

ek bose mein bhi hai inkar kya ma'lum tha

apne bimar-e-mohabbat par the lazim-e-iltifat

bhuloge wo agle qaul-e-iqrar kya ma'lum tha