detā nahīñ dil le ke wo maġhrūr kisī kā

detā nahīñ dil le ke vo maġhrūr kisī kā

sach hai ki na zālim se chale zor kisī kā

ārā.ish-e-husn ā.īna-ruḳh karte ho har dam

lenā hai magar dam tumheñ manzūr kisī kā

be-vajah nahīñ tābish-e-arbāb-e-safā ko

hai jalva-gar is ā.īne meñ nuur kisī kā

aatā hai nazar yaañ jo har aivān-e-shikasta

yak vaqt meñ thā ḳhāna-e-ma.amūr kisī kā

vo shoḳh parī rashk-ba-kaf teġh-e-siyah-mast

aatā hai kiye shīsha-e-dil chuur kisī kā

rokūñ maiñ ab us ko sar-e-rāhe kabhī aa ke

itnā to maiñ rakhkhūñ nahīñ maqdūr kisī kā

'bedār' mujhe yaad usī kī hai shab-o-roz

ne baat kisī kī hai ne mazkūr kisī kā

detā nahīñ dil le ke wo maġhrūr kisī kā

sach hai ki na zālim se chale zor kisī kā

ārāish-e-husn āīna-ruḳh karte ho har dam

lenā hai magar dam tumheñ manzūr kisī kā

be-wajah nahīñ tābish-e-arbāb-e-safā ko

hai jalwa-gar is āīne meñ nur kisī kā

aatā hai nazar yañ jo har aiwān-e-shikasta

yak waqt meñ thā ḳhāna-e-mamūr kisī kā

wo shoḳh parī rashk-ba-kaf teġh-e-siyah-mast

aatā hai kiye shīsha-e-dil chur kisī kā

rokūñ maiñ ab us ko sar-e-rāhe kabhī aa ke

itnā to maiñ rakhkhūñ nahīñ maqdūr kisī kā

'bedār' mujhe yaad usī kī hai shab-o-roz

ne baat kisī kī hai ne mazkūr kisī kā