dida-e-sang mein binai kahan se aae

dīda-e-sañg meñ bīnā.ī kahāñ se aa.e

zarf murda ho to sachchā.ī kahāñ se aa.e

pyaar ta.amīr ho jab buġhz kī buniyādoñ par

miltī nazroñ meñ shanāsā.ī kahāñ se aa.e

gum haiñ rañgoñ meñ ḳhad-o-ḳhāl bhī tasvīroñ ke

pas-e-parda kā tamāshā.ī kahāñ se aa.e

merī har soch ke raste meñ khaḌā hai koī

ā.īna-ḳhāne meñ tanhā.ī kahāñ se aa.e

merī āvāz ḳhamoshī ne mujhe lauTā dī

mujh meñ ab jur.at-e-goyā.ī kahāñ se aa.e

koī bhī dekhnā chāhe na kisī ko zinda

ḳhuuñ ke pyāsoñ meñ masīhā.ī kahāñ se aa.e

is qadar shauq dar-āmad hai 'muzaffar' ham ko

sochte rahte haiñ rusvā.ī kahāñ se aa.e

dida-e-sang mein binai kahan se aae

zarf murda ho to sachchai kahan se aae

pyar tamir ho jab bughz ki buniyaadon par

milti nazron mein shanasai kahan se aae

gum hain rangon mein KHad-o-KHal bhi taswiron ke

pas-e-parda ka tamashai kahan se aae

meri har soch ke raste mein khaDa hai koi

aaina-KHane mein tanhai kahan se aae

meri aawaz KHamoshi ne mujhe lauTa di

mujh mein ab jurat-e-goyai kahan se aae

koi bhi dekhna chahe na kisi ko zinda

KHun ke pyason mein masihai kahan se aae

is qadar shauq dar-amad hai 'muzaffar' hum ko

sochte rahte hain ruswai kahan se aae