dil hai raushan ki hai dil mein ruKH-e-raushan un ka

dil hai raushan ki hai dil meñ ruḳh-e-raushan un kā

zer-e-fānūs-e-badan sham.a hai joban un kā

diid un kī hai visāl un kā tasavvur un kā

jaan un kī hai jigar un kā hai tan man un kā

haiñ vo kāshāna-e-dil meñ kabhī āñkhoñ meñ kabhī

ḳhāna tan hai mirā ghar bhī aur āñgan un kā

hai tasavvur jo unhīñ kā to vo haiñ pesh-e-nigāh

ho ḳhayāl un ke sivā gar to hai rahzan un kā

haiñ tumhīñ meñ vo tum apne ko to dekho ho kaun

jin ko kahte ho ki hai arsh pe maskan un kā

jaan un kī hai har ik jaan kahāñ par vo nahīñ

donoñ-ālam meñ yahī ramz hai muzmin un kā

baiThe baiThe vo kiyā karte haiñ har gul pe nazar

dil-e-āshiq hai magar sair kā gulshan un kā

vo hamāre haiñ ham un ke haiñ unhīñ kā ye zuhūr

jaan un kī hai yahī jaan bhī tan man un kā

aa ke ghar meñ mire 'mardāñ' na vo jaane paa.eñ

tā-qayāmat na chhuTe haath se dāman un kā

dil hai raushan ki hai dil mein ruKH-e-raushan un ka

zer-e-fanus-e-badan shama hai joban un ka

did un ki hai visal un ka tasawwur un ka

jaan un ki hai jigar un ka hai tan man un ka

hain wo kashana-e-dil mein kabhi aankhon mein kabhi

KHana tan hai mera ghar bhi aur aangan un ka

hai tasawwur jo unhin ka to wo hain pesh-e-nigah

ho KHayal un ke siwa gar to hai rahzan un ka

hain tumhin mein wo tum apne ko to dekho ho kaun

jin ko kahte ho ki hai arsh pe maskan un ka

jaan un ki hai har ek jaan kahan par wo nahin

donon-alam mein yahi ramz hai muzmin un ka

baiThe baiThe wo kiya karte hain har gul pe nazar

dil-e-ashiq hai magar sair ka gulshan un ka

wo hamare hain hum un ke hain unhin ka ye zuhur

jaan un ki hai yahi jaan bhi tan man un ka

aa ke ghar mein mere 'mardan' na wo jaane paen

ta-qayamat na chhuTe hath se daman un ka