dil liya jaan li nahin jati

dil liyā jaan lī nahīñ jaatī

aap kī dil-lagī nahīñ jaatī

sab ne ġhurbat meñ mujh ko chhoḌ diyā

ik mirī be-kasī nahīñ jaatī

kaise kah duuñ ki ġhair se miliye

an-kahī to kahī nahīñ jaatī

ḳhud kahānī firāq kī chheḌī

ḳhud kahā bas sunī nahīñ jaatī

ḳhushk dikhlātī hai zabāñ talvār

kyuuñ mirā ḳhuun pī nahīñ jaatī

lākhoñ armān dene vāloñ se

ek taskīn dī nahīñ jaatī

jaan jaatī hai merī jaane do

baat to aap kī nahīñ jaatī

tum kahoge jo ro.uuñ furqat meñ

ki musībat sahī nahīñ jaatī

us ke hote ḳhudī se paak huuñ maiñ

ḳhuub hai be-ḳhudī nahīñ jaatī

pī thī 'bedam' azal meñ kaisī sharāb

aaj tak be-ḳhudī nahīñ jaatī

dil liya jaan li nahin jati

aap ki dil-lagi nahin jati

sab ne ghurbat mein mujh ko chhoD diya

ek meri be-kasi nahin jati

kaise kah dun ki ghair se miliye

an-kahi to kahi nahin jati

KHud kahani firaq ki chheDi

KHud kaha bas suni nahin jati

KHushk dikhlati hai zaban talwar

kyun mera KHun pi nahin jati

lakhon arman dene walon se

ek taskin di nahin jati

jaan jati hai meri jaane do

baat to aap ki nahin jati

tum kahoge jo roun furqat mein

ki musibat sahi nahin jati

us ke hote KHudi se pak hun main

KHub hai be-KHudi nahin jati

pi thi 'bedam' azal mein kaisi sharab

aaj tak be-KHudi nahin jati