duniya ke sitam yaad na apni hi wafa yaad

duniyā ke sitam yaad na apnī hī vafā yaad

ab mujh ko nahīñ kuchh bhī mohabbat ke sivā yaad

maiñ shikva-ba-lab thā mujhe ye bhī na rahā yaad

shāyad ki mire bhūlne vaale ne kiyā yaad

chheḌā thā jise pahle-pahal terī nazar ne

ab tak hai vo ik naġhma-e-be-sāz-o-sadā yaad

jab koī hasīñ hotā hai sargarm-e-navāzish

us vaqt vo kuchh aur bhī aate haiñ sivā yaad

kyā jāniye kyā ho gayā arbāb-e-junūñ ko

jiine kī adā yaad na marne kī adā yaad

muddat huī ik hādisa-e-ishq ko lekin

ab tak hai tire dil ke dhaḌakne kī sadā yaad

haañ haañ tujhe kyā kaam mirī shiddat-e-ġham se

haañ haañ nahīñ mujh ko tire dāman kī havā yaad

maiñ tark-e-rah-o-rasm-e-junūñ kar hī chukā thā

kyuuñ aa ga.ī aise meñ tirī laġhzish-e-pā yaad

kyā lutf ki maiñ apnā pata aap batā.ūñ

kiije koī bhūlī huī ḳhaas apnī adā yaad

duniya ke sitam yaad na apni hi wafa yaad

ab mujh ko nahin kuchh bhi mohabbat ke siwa yaad

main shikwa-ba-lab tha mujhe ye bhi na raha yaad

shayad ki mere bhulne wale ne kiya yaad

chheDa tha jise pahle-pahal teri nazar ne

ab tak hai wo ek naghma-e-be-saz-o-sada yaad

jab koi hasin hota hai sargarm-e-nawazish

us waqt wo kuchh aur bhi aate hain siwa yaad

kya jaaniye kya ho gaya arbab-e-junun ko

jine ki ada yaad na marne ki ada yaad

muddat hui ek hadisa-e-ishq ko lekin

ab tak hai tere dil ke dhaDakne ki sada yaad

han han tujhe kya kaam meri shiddat-e-gham se

han han nahin mujh ko tere daman ki hawa yaad

main tark-e-rah-o-rasm-e-junun kar hi chuka tha

kyun aa gai aise mein teri laghzish-e-pa yaad

kya lutf ki main apna pata aap bataun

kije koi bhuli hui KHas apni ada yaad