aaKHir kHuda-e-be-nishan aaya nazar sifat mein

āḳhir kHudā-e-be-nishāñ aayā nazar sifāt meñ

sunte to the azal se hī dekhā kisī kī zaat meñ

hastī kī is kitāb ke ma.anoñ pe ḳhuub ġhaur kar

lākhoñ qur.ān haiñ nihāñ riñd kī kā.ināt meñ

bande kā aur zaat kā koī bhī fāslā nahīñ

jis tarah din meñ raat hai vaise hī din hai raat meñ

na merī ibtidā koī na merī intihā koī

maiñ hī to ik subūt huuñ duniyā-e-be-sabāt meñ

shān-e-faqīr hai yahī donoñ jahāñ se be-niyāz

ab faqīrī rah ga.ī le de ke pārchāt meñ

terā bhalā ho 'qādrī' merā bharam miTā diyā

ab kyuuñ rind-e-be-riyā uljhe takallufāt meñ

aaKHir kHuda-e-be-nishan aaya nazar sifat mein

sunte to the azal se hi dekha kisi ki zat mein

hasti ki is kitab ke manon pe KHub ghaur kar

lakhon quran hain nihan rind ki kainat mein

bande ka aur zat ka koi bhi fasla nahin

jis tarah din mein raat hai waise hi din hai raat mein

na meri ibtida koi na meri intiha koi

main hi to ek subut hun duniya-e-be-sabaat mein

shan-e-faqir hai yahi donon jahan se be-niyaz

ab faqiri rah gai le de ke parchat mein

tera bhala ho 'qadri' mera bharam miTa diya

ab kyun rind-e-be-riya uljhe takallufat mein