ishq ba-ru-e-kar hua hai andar-andar pinhan-pinhan

'ishq ba-rū-e-kār huā hai andar-andar pinhāñ-pinhāñ

paikar-e-ḳhākī raushan-raushan ruuh ke jalve tābāñ-tābāñ

husn ba-har andāz-e-tajallī raakh kiye detā hai hastī

'ishq ba-har andāz-e-kalīmī ek jhalak par qurbāñ-qurbāñ

jumbish-e-chashm-e-nāz hai kis kī jis se farozāñ shama'-e-hastī

ek hī pal meñ raqsāñ-raqsāñ ik hī pal meñ larzāñ-larzāñ

andeshoñ kī riit pe ham ne naqsh yaqīñ ke ubhre dekhe

kis ke bharose kar baiThe ham aisī mushkil āsāñ-āsāñ

dil kī bāteñ ruuh ke jalve ḳhvāb kī vus.at ham hī ham haiñ

kaise samajh baiThī ye duniyā ham ko ḳhākī arzāñ-arzāñ

apnā falak ko chhoḌ ke ham bhī ġharq hue dariyā-e-junūñ meñ

kal phir sūraj se ubhreñge karne sabko hairāñ-hairāñ

husn mirī āñkhoñ kā partav merī nigāheñ phir bhī parda

'maḳhfī' haiñ jo rāz-e-nihānī kaun karegā 'uryāñ-'uryāñ

'ishq ba-ru-e-kar hua hai andar-andar pinhan-pinhan

paikar-e-KHaki raushan-raushan ruh ke jalwe taban-taban

husn ba-har andaz-e-tajalli rakh kiye deta hai hasti

'ishq ba-har andaz-e-kalimi ek jhalak par qurban-qurban

jumbish-e-chashm-e-naz hai kis ki jis se farozan shama'-e-hasti

ek hi pal mein raqsan-raqsan ek hi pal mein larzan-larzan

andeshon ki rit pe hum ne naqsh yaqin ke ubhre dekhe

kis ke bharose kar baiThe hum aisi mushkil aasan-asan

dil ki baaten ruh ke jalwe KHwab ki wusat hum hi hum hain

kaise samajh baiThi ye duniya hum ko KHaki arzan-arzan

apna falak ko chhoD ke hum bhi gharq hue dariya-e-junun mein

kal phir suraj se ubhrenge karne sabko hairan-hairan

husn meri aankhon ka partaw meri nigahen phir bhi parda

'maKHfi' hain jo raaz-e-nihani kaun karega 'uryan-'uryan