عشق بہ روئے کار ہوا ہے اندر اندر پنہاں پنہاں

عشق بہ روئے کار ہوا ہے اندر اندر پنہاں پنہاں

پیکرِ خاکی روشن روشن روح کے جلوے تاباں تاباں

حسن بہ ہر اندازِ تجلی، راکھ کیے دیتا ہے ہستی

عشق بہ ہر اندازِ کلیمی ایک جھلک پر قرباں قرباں

جنبشِ چشمِ ناز ہے کس کی، جس سے فروزاں شمعٔ ہستی

ایک ہی پل میں رقصاں رقصاں، اک ہی پل میں لرزاں لرزاں

اندیشوں کی ریت پے ہم نے نقش یقیں کے ابھرے دیکھے

کس کے بھروسے کر بیٹھے ہم ایسی مشکل آساں آساں

دل کی باتیں روح کے جلوے خواب کی وسعت ہم ہی ہم ہیں

کیسے سمجھ بیٹھی یہ دنیا ہم کو خاکی ارزاں ارزاں؟

اپنا فلک کو چھوڑ کے ہم بھی غرق ہوئے دریا جنوں میں

کل پھر سورج سے ابھریں گے کرنے سب کو حیراں حیراں

حسن مری آنکھوں کا پرتو میری نگاہیں پھر بھی پردہ

مخفیؔ ہیں جو رازِ نہانی کون کرے گا عریاں عریاں