زخم راضی رہے نشتر کی پذیرائی کو

زخم راضی رہے نشتر کی پذیرائی کو

آپ آئے ہی نہیں کار مسیحائی کو

فہم ہستی نہ کہیں وہم و گماں ہو جائے

رخ دے پردہ جو اٹھا دیں وہ شناسائی کو

ہوش مندی کا تقاضہ ہے تو پھر یوں کیجیے

آپ آنکھوں سے چرا لیجیے بینائی کو

تجھ پہ تف ہے کہ تجھے حسن کا عرفان نہیں

تو نے آوارہ سمجھ رکھا ہے لیلائی کو

سوزن و خار سے وابستہ ہے ہر ریشۂ دل

عشق اک سرخ قبا مانگے ہے زیبائی کو

دامن خار سے لپٹی ہیں ہزاروں کلیاں

کچھ تحفظ بھی یہاں چاہیے رعنائی کو

اپنی صورت میں چھپا رکھی ہے مخفیؔ صورت

آئینہ قید کیے بیٹھا ہے ہرجائی کو