gham-e-jaanan se dil manus jab se ho gaya mujhko

ġham-e-jānāñ se dil mānūs jab se ho gayā mujh ko

hañsī achchhī nahīñ lagtī ḳhushī achchhī nahīñ lagtī

yaqīnan zulm kī har baat sun kar kahne vaale se

kahegā ye har achchhā aadmī achchhī nahīñ lagtī

galī terī burī lagtī nahīñ thī jān-e-jāñ lekin

nahīñ hai jab se tū terī galī achchhī nahīñ lagtī

ḳhushī se maut aa.e ab mujhe marnā gavārā hai

ga.e vo jab se mujh ko zindagī achchhī nahīñ lagtī

na chheḌo ham-nashīnoñ shām-e-ġham 'purnam' ko rone do

musībat meñ kisī kī dil-lagī achchhī nahīñ lagtī

gham-e-jaanan se dil manus jab se ho gaya mujh ko

hansi achchhi nahin lagti KHushi achchhi nahin lagti

yaqinan zulm ki har baat sun kar kahne wale se

kahega ye har achchha aadmi achchhi nahin lagti

gali teri buri lagti nahin thi jaan-e-jaan lekin

nahin hai jab se tu teri gali achchhi nahin lagti

KHushi se maut aae ab mujhe marna gawara hai

gae wo jab se mujh ko zindagi achchhi nahin lagti

na chheDo ham-nashinon sham-e-gham 'purnam' ko rone do

musibat mein kisi ki dil-lagi achchhi nahin lagti