gul ka kiya jo chaak gareban bahaar ne

gul kā kiyā jo chaak garebāñ bahār ne

dast-e-junūñ lage mire kapḌe utārne

chhoḌā kahīñ na mujh ko nasīm-e-bahār ne

kunj-e-qafas meñ bhī mujhe aa.ī ubhārne

ab dil kī laaj mashq-e-tasavvur ke haath hai

shīsha meñ us parī ko chalā hai utārne

saaqī to saaqī bāda-parastoñ ke paañv par

sajde karā.e laġhzish-e-mastāna-vār ne

ab to nazar meñ daulat-e-kaunain hech hai

jab tujh ko pā liyā dil-e-ummīd-vār ne

chashm-e-adā-shanās ko hairān kar diyā

husn apnā zarre zarre meñ dikhlā ke yaar ne

'bedam' tumhārī āñkheñ haiñ kyā arsh kā charāġh

raushan kiyā hai naqsh-e-kaf-e-pā-e-yār ne

gul ka kiya jo chaak gareban bahaar ne

dast-e-junun lage mere kapDe utarne

chhoDa kahin na mujh ko nasim-e-bahaar ne

kunj-e-qafas mein bhi mujhe aai ubhaarne

ab dil ki laj mashq-e-tasawwur ke hath hai

shisha mein us pari ko chala hai utarne

saqi to saqi baada-paraston ke panw par

sajde karae laghzish-e-mastana-war ne

ab to nazar mein daulat-e-kaunain hech hai

jab tujh ko pa liya dil-e-ummid-war ne

chashm-e-ada-shanas ko hairan kar diya

husn apna zarre zarre mein dikhla ke yar ne

'bedam' tumhaari aankhen hain kya arsh ka charagh

raushan kiya hai naqsh-e-kaf-e-pa-e-yar ne