haye majburi dil-e-nashad ki

haaye majbūrī dil-e-nāshād kī

rū-ba-rū un ke bhī na fariyād kī

dil ke hāthoñ luT ga.e rusvā hue

kyā kahūñ tafsīl us rūdād kī

hai vafā jab maz.hab-e-'ishq-e-ġhayūr

kyā shikāyat husn ke bedād kī

ek us kī yaad hī to hai faqat

daulat mujh se be-kas-o-be-dād kī

'ishq vaalo ne ḳharābe meñ yahāñ

ik na.ī duniyā-e-dūñ ābād kī

ik qayāmat roz hai dil pe mire

kyā kahūñ us vā’da-o-mī’ād kī

bole vo qabr-e-shikasta pe mirī

'ishq ne miTTī terī barbād kī

chhā gayā ek kaif kā 'ālam basīt

jab bhī chashm-e-nargisīñ vo yaad kī

piitā huuñ mai kah ke bismillāh 'farāz'

karbalā kī diivā aur baġhdād kī

haye majburi dil-e-nashad ki

ru-ba-ru un ke bhi na fariyaad ki

dil ke hathon luT gae ruswa hue

kya kahun tafsil us rudad ki

hai wafa jab mazhab-e-'ishq-e-ghayur

kya shikayat husn ke bedad ki

ek us ki yaad hi to hai faqat

daulat mujh se be-kas-o-be-dad ki

'ishq walo ne KHarabe mein yahan

ek nai duniya-e-dun aabaad ki

ek qayamat roz hai dil pe mere

kya kahun us wa’da-o-mi’ad ki

bole wo qabr-e-shikasta pe meri

'ishq ne miTTi teri barbaad ki

chha gaya ek kaif ka 'alam basit

jab bhi chashm-e-nargisin wo yaad ki

pita hun mai kah ke bismillah 'faraaz'

karbala ki diwa aur baghdad ki