nikle jo dam kisi ka tere intizar mein

nikle jo dam kisī kā tere intizār meñ

kyā ḳhaak chain paa.e vo kunj-e-mazār meñ

o mast-e-nāz uf terī mahshar-ḳhirāmiyāñ

ik hashr sā bapā hai dil-e-be-qarār meñ

kahnā na phir kahīñ hameñ badnām kar diyā

dekho ki dil nahīñ hai mire iḳhtiyār meñ

ab kyā kaheñ ki kaise milā āstān-e-yār

sajde qadam qadam pe kiye rāh-guzār meñ

us andalīb-e-soḳhta-sāmāñ kī kuchh na pūchh

jis kā ujaḌ gayā ho nasheman bahār meñ

us barq-vash ke husn kī allāh re tapish

ik aag sī lagī hai dil-e-dāġh-dār meñ

qismat kī nā-rasā.iyāñ ba.ad-e-fanā rahīñ

mar ke bhī dafn ho na sakā kū-e-yār meñ

kyā pūchhte ho dil kā pata dil kā kyā pata

muddat huī ki mil gayā gard-o-ġhubār meñ

ḳhurshīd-e-hashr apnī dikhātā hai tābisheñ

maiñ so rahā huuñ gosha-e-dāmān-e-yār meñ

'hairat' ki tujh ko hairat-e-dīdār ho nasīb

aa dekh le tū shān-e-ḳhudā husn-e-yār meñ

nikle jo dam kisi ka tere intizar mein

kya KHak chain pae wo kunj-e-mazar mein

o mast-e-naz uf teri mahshar-KHiramiyan

ek hashr sa bapa hai dil-e-be-qarar mein

kahna na phir kahin hamein badnam kar diya

dekho ki dil nahin hai mere iKHtiyar mein

ab kya kahen ki kaise mila aastan-e-yar

sajde qadam qadam pe kiye rah-guzar mein

us andalib-e-soKHta-saman ki kuchh na puchh

jis ka ujaD gaya ho nasheman bahaar mein

us barq-wash ke husn ki allah re tapish

ek aag si lagi hai dil-e-dagh-dar mein

qismat ki na-rasaiyan baad-e-fana rahin

mar ke bhi dafn ho na saka ku-e-yar mein

kya puchhte ho dil ka pata dil ka kya pata

muddat hui ki mil gaya gard-o-ghubar mein

KHurshid-e-hashr apni dikhata hai tabishen

main so raha hun gosha-e-daman-e-yar mein

'hairat' ki tujh ko hairat-e-didar ho nasib

aa dekh le tu shan-e-KHuda husn-e-yar mein