halak-e-tegh-e-jafa ya shahid-e-naz kare

halāk-e-teġh-e-jafā yā shahīd-e-nāz kare

tirā karam hai jise jaise sarfarāz kare

har ek zarra hai aalam kā gosh-bar-āvāz

to phir kahāñ pe koī guftugū-e-rāz kare

tajalliyāñ jise ghere hoñ tere jalve kī

vo dair-o-ka.aba meñ kyā ḳhaak imtiyāz kare

muhāl tark-e-ḳhayāl-e-najāt hai lekin

vo be-niyāz jise chāhe be-niyāz kare

mire karīm jo be-māñge tujh se paatā ho

vo jā ke kyuuñ kahīñ dast-e-talab darāz kare

ye husn-o-ishq kā hai ittihād-e-yak-rañgī

vahī hai marzī-e-mahmūd jo ayaaz kare

banā.e zinda-e-jāved yā rakhe 'bedam'

mire sar āñkhoñ pe jo kuchh nigāh-e-nāz kare

halak-e-tegh-e-jafa ya shahid-e-naz kare

tera karam hai jise jaise sarfaraaz kare

har ek zarra hai aalam ka gosh-bar-awaz

to phir kahan pe koi guftugu-e-raaz kare

tajalliyan jise ghere hon tere jalwe ki

wo dair-o-kaba mein kya KHak imtiyaz kare

muhaal tark-e-KHayal-e-najat hai lekin

wo be-niyaz jise chahe be-niyaz kare

mere karim jo be-mange tujh se pata ho

wo ja ke kyun kahin dast-e-talab daraaz kare

ye husn-o-ishq ka hai ittihad-e-yak-rangi

wahi hai marzi-e-mahmud jo ayaz kare

banae zinda-e-jawed ya rakhe 'bedam'

mere sar aankhon pe jo kuchh nigah-e-naz kare