hum dil miTa ke manzil-e-taskin pa gae

ham dil miTā ke manzil-e-taskīn pā ga.e

ab zindagī ko jiine ke andāz aa ga.e

barbādiyāñ vo shiddat-e-ehsās de ga.iiñ

ġhuncha bhī koī chaTkā to ham tilmilā ga.e

sau rāste talab ko dikhā.e ummīd ne

jab bhī huā gumān ki manzil pe aa ga.e

duniyā meñ kis se māñgeñ nigāh-e-karam kī bhiik

ham se to hādisāt bhī āñkheñ churā ga.e

ehsās-e-bekasī kī nazākat pe ik nazar

phir un pe tabsira ki jo dāman bachā ga.e

aksar huā hai ye bhī ki pursān-e-hāl bhī

hamdardiyoñ se dard kī shiddat baḌhā ga.e

vo chashm-e-iltifāt-e-gurezāñ bhī ho ga.ī

ahl-e-vafā sila bhī vafāoñ kā pā ga.e

iz.hār ġham meñ dil kā vo 'ālam ki al-amāñ

jumbish huī zabāñ ko to lab thartharā ga.e

aañsū kuchh is tarah se chhalak aa.e ai 'niyāz'

zālim mirī nazar se mujhe bhī girā ga.e

hum dil miTa ke manzil-e-taskin pa gae

ab zindagi ko jine ke andaz aa gae

barbaadiyan wo shiddat-e-ehsas de gain

ghuncha bhi koi chaTka to hum tilmila gae

sau raste talab ko dikhae ummid ne

jab bhi hua guman ki manzil pe aa gae

duniya mein kis se mangen nigah-e-karam ki bhik

hum se to hadisat bhi aankhen chura gae

ehsas-e-bekasi ki nazakat pe ek nazar

phir un pe tabsira ki jo daman bacha gae

aksar hua hai ye bhi ki pursan-e-haal bhi

hamdardiyon se dard ki shiddat baDha gae

wo chashm-e-iltifat-e-gurezan bhi ho gai

ahl-e-wafa sila bhi wafaon ka pa gae

izhaar gham mein dil ka wo 'alam ki al-aman

jumbish hui zaban ko to lab tharthara gae

aansu kuchh is tarah se chhalak aae ai 'niyaz'

zalim meri nazar se mujhe bhi gira gae