hum hī tanhā na tirī chashm ke bīmār hue

ham hī tanhā na tirī chashm ke bīmār hue

is maraz meñ to ka.ī ham se giraftār hue

sīna-e-ḳhasta hamāre se hai ġhirbāl ko rashk

nāvak-e-ġham jigar-o-dil se zi-bas paar hue

bikne motī lage bāzār meñ kauḌī kauḌī

yaad meñ terī zi-bas chashm-e-guhar-bār hue

roz-e-avval ki tum aa misr-e-mohabbat ke biich

yūsuf-e-asr hue raunaq-e-bāzār hue

naqd-e-jān-o-dil-o-dīñ de ke liyā ham ne tumheñ

saikḌoñ ahl-e-havas garche ḳharīdār hue

ghar meñ le aa.e tumheñ chaah se karne shādī

ki tum is ġham-kade meñ sham-e-shab-tār hue

ruḳh-e-tābāñ se tumhāre ki hai ḳhurshīd-misāl

dar-o-dīvār sabhī matla-e-anvār hue

DhūñDhte tum ko paḌe phirte the ham shahr-ba-shahr

ḳhvār-o-rusvā-e-sar-e-kūcha-o-bāzār hue

lillāhil-hamd ki muddat meñ tum ai nūr-e-nigāh

bā.is-e-raushnī-e-dīda-e-ḳhūñ-bār hue

ḳhāna-e-chashm meñ rakhte the shab-o-roz ki tum

qurrat-ul-ain hue rāhat-e-dīdār hue

dekh kar mehr-o-vafā o karam-o-lutf ko ham

jānte yuuñ the ki tum yār-e-vafādār hue

jis meñ tum hote ḳhushī so hī to ham karte the

par nahīñ jānte kis vāste bezār hue

ab hameñ chhoḌ ke yuuñ zār-o-nizār-o-ġhamgīñ

tum kahīñ aur hī jā yaañ se numūdār hue

ye to hargiz hī na thī tum se tavaqqo ham ko

ki sitamgār dil-āzār jafā-kār hue

na vo iḳhlās-o-mohabbat hai na vo mehr-o-vafā

sheva-e-jaur-o-jafā-o-sitam iz.hār hue

yā vo altāf-o-karam thā ki sadā rahte the

ai gul-andām hamāre ga.e ke haar hue

is meñ hairāñ haiñ ki kyā aisī huī hai taqsīr

qatl karne ke ta.iiñ phirte ho tayār hue

teġh-e-ḳhūñ-rez-ba-kaf ḳhanjar-e-burrāñ ba-miyāñ

har ghaḌī sāmne aa jaate ho ḳhuñḳhār hue

phir to kyā hai sunte ho uTho bismillāh

khīñch kar teġh ko aao jo sitamgār hue

varna dil khol ke lag jaao gale se pyāre

go ki ham qatl hī karne ke sazā-vār hue

utnī hī baat ke kahne meñ ki ik bosa do

aah ai shoḳh jo aise hī gunāhgār hue

tauba karte haiñ qasam khāte haiñ sunte ho tum

phir nahīñ kahne ke aage ko ḳhabar-dār hue

pūchhtā kyā hai tū 'bedār' hamārā ahvāl

dām-e-ḳhūbāñ meñ phir ab aa.e giraftār hue

hum hī tanhā na tirī chashm ke bīmār hue

is maraz meñ to kaī hum se giraftār hue

sīna-e-ḳhasta hamāre se hai ġhirbāl ko rashk

nāwak-e-ġham jigar-o-dil se zi-bas par hue

bikne motī lage bāzār meñ kauḌī kauḌī

yaad meñ terī zi-bas chashm-e-guhar-bār hue

roz-e-awwal ki tum aa misr-e-mohabbat ke bich

yūsuf-e-asr hue raunaq-e-bāzār hue

naqd-e-jān-o-dil-o-dīñ de ke liyā hum ne tumheñ

saikḌoñ ahl-e-hawas garche ḳharīdār hue

ghar meñ le aae tumheñ chah se karne shādī

ki tum is ġham-kade meñ sham-e-shab-tār hue

ruḳh-e-tābāñ se tumhāre ki hai ḳhurshīd-misāl

dar-o-dīwār sabhī matla-e-anwār hue

DhūñDhte tum ko paḌe phirte the hum shahr-ba-shahr

ḳhwār-o-ruswā-e-sar-e-kūcha-o-bāzār hue

lillāhil-hamd ki muddat meñ tum ai nūr-e-nigāh

bāis-e-raushnī-e-dīda-e-ḳhūñ-bār hue

ḳhāna-e-chashm meñ rakhte the shab-o-roz ki tum

qurrat-ul-ain hue rāhat-e-dīdār hue

dekh kar mehr-o-wafā o karam-o-lutf ko hum

jānte yuñ the ki tum yār-e-wafādār hue

jis meñ tum hote ḳhushī so hī to hum karte the

par nahīñ jānte kis wāste bezār hue

ab hameñ chhoḌ ke yuñ zār-o-nizār-o-ġhamgīñ

tum kahīñ aur hī jā yañ se numūdār hue

ye to hargiz hī na thī tum se tawaqqo hum ko

ki sitamgār dil-āzār jafā-kār hue

na wo iḳhlās-o-mohabbat hai na wo mehr-o-wafā

shewa-e-jaur-o-jafā-o-sitam izhār hue

yā wo altāf-o-karam thā ki sadā rahte the

ai gul-andām hamāre gae ke haar hue

is meñ hairāñ haiñ ki kyā aisī huī hai taqsīr

qatl karne ke taiñ phirte ho tayār hue

teġh-e-ḳhūñ-rez-ba-kaf ḳhanjar-e-burrāñ ba-miyāñ

har ghaḌī sāmne aa jate ho ḳhuñḳhār hue

phir to kyā hai sunte ho uTho bismillāh

khīñch kar teġh ko aao jo sitamgār hue

warna dil khol ke lag jao gale se pyāre

go ki hum qatl hī karne ke sazā-wār hue

utnī hī baat ke kahne meñ ki ek bosa do

aah ai shoḳh jo aise hī gunāhgār hue

tauba karte haiñ qasam khāte haiñ sunte ho tum

phir nahīñ kahne ke aage ko ḳhabar-dār hue

pūchhtā kyā hai tū 'bedār' hamārā ahwāl

dām-e-ḳhūbāñ meñ phir ab aae giraftār hue