har ek chehre se be-rabti ’ayan hai

har ik chehre se be-rabtī ’ayāñ hai

mohabbat hai magar jaane kahāñ hai

tire kānoñ meñ aate haiñ jo alfāz

vo be-mā'nī-sī koī dāstāñ hai

ye hastī hai musalsal ḳhvāb lekin

har ik lamha hayāt-e-jāvidāñ hai

koī shaidā nahīñ husn-e-butāñ kā

ba-zāhir ik hujūm-e-'āshiqāñ hai

hamīñ tum haiñ rumūz-e-bazm-e-hastī

zamāna ek andāz-e-bayāñ hai

'nushūr' apnī ġhazal se raushnī le

ki shā.ir bhī charāġh-e-gul-fishāñ hai

har ek chehre se be-rabti ’ayan hai

mohabbat hai magar jaane kahan hai

tere kanon mein aate hain jo alfaz

wo be-ma'ni-si koi dastan hai

ye hasti hai musalsal KHwab lekin

har ek lamha hayat-e-jawidan hai

koi shaida nahin husn-e-butan ka

ba-zahir ek hujum-e-'ashiqan hai

hamin tum hain rumuz-e-bazm-e-hasti

zamana ek andaz-e-bayan hai

'nushur' apni ghazal se raushni le

ki shair bhi charagh-e-gul-fishan hai