har taraf se jhankta hai ru-e-jaanana mujhe

har taraf se jhāñktā hai rū-e-jānāna mujhe

mahfil-e-hastī hai goyā ā.īnā-kHāna mujhe

ik qiyāmat Dhā.egā duniyā se uTh jaanā mirā

yaad kar ke ro.eñge yārān-e-mai-kHāna mujhe

dil milāte bhī nahīñ dāman chhuḌāte bhī nahīñ

tum ne āḳhir kyuuñ banā rakhā hai dīvāna mujhe

yā kamāl-e-qurb ho yā intihā-e-bo'd ho

yā nibhānā saath yā phir bhuul hī jaanā mujhe

tū hī batlā us ta.alluq ko bhalā kyā naam duuñ

saarī duniyā kah rahī hai terā dīvāna mujhe

jis ke sannāTe hoñ merī ḳhāmushī se ham-kalām

kaash mil jaaye 'nasīr' ik aisā vīrāna mujhe

har taraf se jhankta hai ru-e-jaanana mujhe

mahfil-e-hasti hai goya aaina-kHana mujhe

ek qiyamat Dhaega duniya se uTh jaana mera

yaad kar ke roenge yaran-e-mai-kHana mujhe

dil milate bhi nahin daman chhuDate bhi nahin

tum ne aaKHir kyun bana rakha hai diwana mujhe

ya kamal-e-qurb ho ya intiha-e-bo'd ho

ya nibhana sath ya phir bhul hi jaana mujhe

tu hi batla us talluq ko bhala kya nam dun

sari duniya kah rahi hai tera diwana mujhe

jis ke sannaTe hon meri KHamushi se ham-kalam

kash mil jaye 'nasir' ek aisa virana mujhe