hujum-e-be-kasi ki wajh lutf-e-be-karan paya

hujūm-e-be-kasī kī vaj.h lutf-e-be-karāñ paayā

ki ham ne aaj us nā-mehrbāñ ko mehrbāñ paayā

magar thā rañg bazm-e-yār meñ nairañg-e-ālam kā

kisī ko sar-nigūñ dekhā kisī ko shādmāñ paayā

sitam samjhe hue the ham tirī be-e'tinā.ī ko

magar jab ġhaur se dekhā to ik lutf-e-nihāñ paayā

kise fursat tumhārī justujū ke shauq-e-behad se

abhī ham ne kahāñ DhūñDhā abhī ham ne kahāñ paayā

na samjhā bāni-e-jaur-o-jafā us shoḳh ko koī

ki ham ne jis ko paayā shikva-sanj-āsmāñ paayā

na pā sakte kabhī pāband rah kar qaid-e-hastī meñ

so ham ne be-nishāñ ho kar tujhe o be-nishāñ paayā

haqīqat nāla-e-dil se khulī ġham-hā-e-pinhāñ kī

sunā sū-e-jaras jis ne nishān-e-kārvāñ paayā

hañsī ibrat bahut jab rañg-e-gul kī be-sabātī ne

chaman meñ andalīb-e-sāda-dil ko shādmāñ paayā

na jaane koī merī vaz.a-e-rusvā par ki ai 'hasrat'

kamāl-e-āshiqī ne mujh ko yaktā-e-zamāñ paayā

hujum-e-be-kasi ki wajh lutf-e-be-karan paya

ki hum ne aaj us na-mehrban ko mehrban paya

magar tha rang bazm-e-yar mein nairang-e-alam ka

kisi ko sar-nigun dekha kisi ko shadman paya

sitam samjhe hue the hum teri be-e'tinai ko

magar jab ghaur se dekha to ek lutf-e-nihan paya

kise fursat tumhaari justuju ke shauq-e-behad se

abhi hum ne kahan DhunDha abhi hum ne kahan paya

na samjha bani-e-jaur-o-jafa us shoKH ko koi

ki hum ne jis ko paya shikwa-sanj-asman paya

na pa sakte kabhi paband rah kar qaid-e-hasti mein

so hum ne be-nishan ho kar tujhe o be-nishan paya

haqiqat nala-e-dil se khuli gham-ha-e-pinhan ki

suna su-e-jaras jis ne nishan-e-karwan paya

hansi ibrat bahut jab rang-e-gul ki be-sabaati ne

chaman mein andalib-e-sada-dil ko shadman paya

na jaane koi meri waza-e-ruswa par ki ai 'hasrat'

kamal-e-ashiqi ne mujh ko yakta-e-zaman paya