husn-e-taban us taraf hai ishq-e-sozan is taraf

husn-e-tābāñ us taraf hai ishq-e-sozāñ ''is taraf

vo pareshāñ us taraf hai ham pareshāñ is taraf

ka.aba-e-dil us taraf hai qbila-e-jāñ is taraf

us taraf allāh kā ghar kū-e-jānāñ is taraf

laakh īmānoñ pe bhārī hai adā-e-kāfirī

ek kāfir us taraf saare musalmāñ is taraf

husn-mahv-e-rang-o-bū hai ishq ġharq-e-hā.e-o-hū

har gulistāñ us taraf hai har bayābāñ is taraf

saañs meñ āvāz-e-nai hai dil ġhazal-ḳhvāñ hai 'zhīn'

shāyad aane ko hai vo jān-e-bahārāñ is taraf

husn-e-taban us taraf hai ishq-e-sozan is taraf

wo pareshan us taraf hai hum pareshan is taraf

kaba-e-dil us taraf hai qbila-e-jaan is taraf

us taraf allah ka ghar ku-e-jaanan is taraf

lakh imanon pe bhaari hai ada-e-kafiri

ek kafir us taraf sare musalman is taraf

husn-mahw-e-rang-o-bu hai ishq gharq-e-hae-o-hu

har gulistan us taraf hai har bayaban is taraf

sans mein aawaz-e-nai hai dil ghazal-KHwan hai 'zhin'

shayad aane ko hai wo jaan-e-bahaaran is taraf