ishq ke aasar hain phir ghash mujhe aaya dekho

ishq ke āsār haiñ phir ġhash mujhe aayā dekho

phir koī rauzan-e-dīvār se jhāñkā dekho

un ke milne kī tamannā meñ miTā jaatā huuñ

na.ī duniyā hai mire shauq kī duniyā dekho

tuur par hī nahīñ nazzāra-e-jānāñ mauqūf

dekhnā ho to vo maujūd hai har jā dekho

asar-e-nāla-e-āshiq nahīñ dekhā tum ne

thaam lo dil ko sambhal baiTho ab achchhā dekho

taur majnūñ kī nigāhoñ ke batāte haiñ hameñ

isī lailā meñ hai ik dūsrī lailā dekho

partav-e-mehr se ma.amūr hai zarra zarra

lahreñ letā hai har ik qatre meñ dariyā dekho

duur ho jaa.eñ jo āñkhoñ se hijābāt-e-duī

phir to dil hī meñ do-ālam kā tamāshā dekho

sab meñ DhūñDā unheñ aur kī to na kī dil meñ talāsh

nazar-e-shauq kahāñ khaa.ī hai dhokā dekho

nahīñ thamte nahīñ thamte mire aañsū 'bedam'

rāz-e-dil un pe huā jaatā hai ifshā dekho

ishq ke aasar hain phir ghash mujhe aaya dekho

phir koi rauzan-e-diwar se jhanka dekho

un ke milne ki tamanna mein miTa jata hun

nai duniya hai mere shauq ki duniya dekho

tur par hi nahin nazzara-e-jaanan mauquf

dekhna ho to wo maujud hai har ja dekho

asar-e-nala-e-ashiq nahin dekha tum ne

tham lo dil ko sambhal baiTho ab achchha dekho

taur majnun ki nigahon ke batate hain hamein

isi laila mein hai ek dusri laila dekho

partaw-e-mehr se mamur hai zarra zarra

lahren leta hai har ek qatre mein dariya dekho

dur ho jaen jo aankhon se hijabaat-e-dui

phir to dil hi mein do-alam ka tamasha dekho

sab mein DhunDa unhen aur ki to na ki dil mein talash

nazar-e-shauq kahan khai hai dhoka dekho

nahin thamte nahin thamte mere aansu 'bedam'

raaz-e-dil un pe hua jata hai ifsha dekho