jahan huzur ki mahsus ki kami maine

jahāñ huzūr kī mahsūs kī kamī maiñ ne

vahāñ na paa.ī fazāoñ meñ raushnī maiñ ne

ḳhirad ko sauñp ke ehsās-e-kamtarī maiñ ne

ḳhud apnī raah nikālī kabhī-kabhī maiñ ne

tire karam ke maze ḳhūb-ḳhūb luuTe haiñ

taḌap-taḌap ke guzārī hai zindagī maiñ ne

na jītne kī tamannā na haar kī parvā

ḳhulūs-e-’ishq kī baazī lagā to dī maiñ ne

kisī pe marne se itnā to fā.ida pahuñchā

na jaane kitnoñ ko baḳhshī hai zindagī maiñ ne

tirī nigāh meñ merā maqām kuchh bhī sahī

junūñ kī sharm baharhāl rakh to lī maiñ ne

sar-e-niyāz rahā un ke pā-e-nāz rahe

baḌe maze se guzārī hai zindagī maiñ ne

ye kyā kamāl nahīñ jur.at-e-mohabbat kā

mizāj-e-husn ko baḳhshī hai barhamī maiñ ne

zabān-e-ḳhalq se qāsid kā kaam lenā thā

jo dil kī baat hazāroñ meñ Daal dī maiñ ne

vo ik nigāh ki sab kuchh hī jis ne luuT liyā

usī nigāh se paa.ī hai zindagī maiñ ne

kamāl-e-bāda-kashī ho ki zuhd-e-‘kāmil’ ho

nigāh-e-yār kī aksar sharāp pī maiñ ne

jahan huzur ki mahsus ki kami main ne

wahan na pai fazaon mein raushni main ne

KHirad ko saunp ke ehsas-e-kamtari main ne

KHud apni rah nikali kabhi-kabhi main ne

tere karam ke maze KHub-KHub luTe hain

taDap-taDap ke guzari hai zindagi main ne

na jitne ki tamanna na haar ki parwa

KHulus-e-’ishq ki bazi laga to di main ne

kisi pe marne se itna to faida pahuncha

na jaane kitnon ko baKHshi hai zindagi main ne

teri nigah mein mera maqam kuchh bhi sahi

junun ki sharm baharhaal rakh to li main ne

sar-e-niyaz raha un ke pa-e-naz rahe

baDe maze se guzari hai zindagi main ne

ye kya kamal nahin jurat-e-mohabbat ka

mizaj-e-husn ko baKHshi hai barhami main ne

zaban-e-KHalq se qasid ka kaam lena tha

jo dil ki baat hazaron mein Dal di main ne

wo ek nigah ki sab kuchh hi jis ne luT liya

usi nigah se pai hai zindagi main ne

kamal-e-baada-kashi ho ki zuhd-e-‘kaamil’ ho

nigah-e-yar ki aksar sharap pi main ne