kaam aaKHir jazba-e-be-iKHtiyar aa hi gaya

kaam āḳhir jazba-e-be-iḳhtiyār aa hī gayā

dil kuchh is sūrat se taḌpā un ko pyaar aa hī gayā

jab nigāheñ uTh ga.iiñ allāh rī merāj-shauq

dekhtā kyā huuñ vo jān-e-intizār aa hī gayā

haaye ye husn-e-tasavvur kāfirīn-e-rañg-o-bū

maiñ ye samjhā jaise vo jān-e-bahār aa hī gayā

haañ sazā de ai ḳhudā-e-ishq ai taufīq-e-ġham

phir zabān-e-be-adab par zikr-e-yār aa hī gayā

is tarah ḳhush huuñ kisī ke va.ada-e-fardā pe maiñ

dar-haqīqat jaise mujh ko e'tibār aa hī gayā

haa.e kāfir-dil kī ye kāfir-jūuñ-añgeziyāñ

tum ko pyaar aa.e na aa.e mujh ko pyaar aa hī gayā

dard ne karvaT hī badlī thī ki dil kī aar se

daf.atan parda uThā aur parda-dār aa hī gayā

dil ne ik naala kiyā aaj is tarah dīvāna-vār

baal bikhrā.e koī msatānā-vār aa hī gayā

jaan hī de dī 'jigar' ne aaj pā-e-yār par

umr-bhar kī be-qarārī ko qarār aa hī gayā

kaam aaKHir jazba-e-be-iKHtiyar aa hi gaya

dil kuchh is surat se taDpa un ko pyar aa hi gaya

jab nigahen uTh gain allah ri meraj-shauq

dekhta kya hun wo jaan-e-intizar aa hi gaya

haye ye husn-e-tasawwur kafirin-e-rang-o-bu

main ye samjha jaise wo jaan-e-bahaar aa hi gaya

han saza de ai KHuda-e-ishq ai taufiq-e-gham

phir zaban-e-be-adab par zikr-e-yar aa hi gaya

is tarah KHush hun kisi ke wada-e-farda pe main

dar-haqiqat jaise mujh ko e'tibar aa hi gaya

hae kafir-dil ki ye kafir-juun-angeziyan

tum ko pyar aae na aae mujh ko pyar aa hi gaya

dard ne karwaT hi badli thi ki dil ki aar se

dafatan parda uTha aur parda-dar aa hi gaya

dil ne ek nala kiya aaj is tarah diwana-war

baal bikhrae koi msatana-war aa hi gaya

jaan hi de di 'jigar' ne aaj pa-e-yar par

umr-bhar ki be-qarari ko qarar aa hi gaya