jo kisi pe aap na kar sake mujhe us jafa ki talash hai

jo kisī pe aap na kar sake mujhe us jafā kī talāsh hai

rahe jis se aap bhī be-ḳhabar mujhe us adā kī talāsh hai

jo tire jamāl pe chhā sake mujhe us baqā kī hai aarzū

tirā husn jis meñ samā sake mujhe us fanā kī talāsh hai

hai tamām ḳhvāhish-o-justajū ye mire junūn kī intihā

jo huī thī terī nigāh se usī ibtidā kī talāsh hai

mire hosh meñ jo na aa sakā jo mire junūñ se na jā sakā

usī be-vafā kī hai justujū usī āshnā kī talāsh hai

kahāñ tū ne 'maikash'-e-mast ko kyā ġham ki terī nigāh meñ

usī ġham-zada kī hai justujū usī mubtalā kī talāsh hai

jo kisi pe aap na kar sake mujhe us jafa ki talash hai

rahe jis se aap bhi be-KHabar mujhe us ada ki talash hai

jo tere jamal pe chha sake mujhe us baqa ki hai aarzu

tera husn jis mein sama sake mujhe us fana ki talash hai

hai tamam KHwahish-o-justaju ye mere junun ki intiha

jo hui thi teri nigah se usi ibtida ki talash hai

mere hosh mein jo na aa saka jo mere junun se na ja saka

usi be-wafa ki hai justuju usi aashna ki talash hai

kahan tu ne 'maikash'-e-mast ko kya gham ki teri nigah mein

usi gham-zada ki hai justuju usi mubtala ki talash hai