jo ye jism sar-ta-qadam dekhte hain

jo ye jism sar-tā-qadam dekhte haiñ

tumhīñ tum ko ham ai sanam dekhte haiñ

ye sab aap hī kī hai guft-o-shunīd

jo gosh-o-zabān-o-qalam dekhte haiñ

aur aapī kā hai sab ye jalva miyāñ

jo pesh-e-nazar dam-ba-dam dekhte haiñ

jo haiñ mahv-e-dīdār ham is qadar

ye aapī kā lutf-o-karam dekhte haiñ

piyā jab se jām-e-sharāb-e-tahūra

tabhī se to dam haiñ adam dekhte haiñ

tan-o-jān-o-dil jumla harkāt meñ

shah-e-qul-hu-allāh ko ham dekhte haiñ

tumhīñ ho 'safī' 'shāh-e-mardāñ' kī diid

na ham besh dekheñ na kam dekhte haiñ

jo ye jism sar-ta-qadam dekhte hain

tumhin tum ko hum ai sanam dekhte hain

ye sab aap hi ki hai guft-o-shunid

jo gosh-o-zaban-o-qalam dekhte hain

aur aapi ka hai sab ye jalwa miyan

jo pesh-e-nazar dam-ba-dam dekhte hain

jo hain mahw-e-didar hum is qadar

ye aapi ka lutf-o-karam dekhte hain

piya jab se jam-e-sharab-e-tahura

tabhi se to dam hain adam dekhte hain

tan-o-jaan-o-dil jumla harkat mein

shah-e-qul-hu-allah ko hum dekhte hain

tumhin ho 'safi' 'shah-e-mardan' ki did

na hum besh dekhen na kam dekhte hain