karwan-e-umr-e-rafta ki nishani rah gai

kārvān-e-umr-e-rafta kī nishānī rah ga.ī

ruuh ban kar iztirāb-e-jāvedānī rah ga.ī

ek nuqta par simaT kar zindagānī rah ga.ī

naqsh ho kar dil meñ un kī mehrbānī rah ga.ī

ham bahut aage nikal aa.e hayāt-e-ishq meñ

saath thoḌī duur chal kar umr-e-fānī rah ga.ī

apnī sūrat dekh kar terī haqīqat dekh leñ

ab yahī ik shakl-e-idrak-e-mānī rah ga.ī

aap aa jaa.eñ to ho jaa.e ye qissa bhī tamām

zindagī ho kar adhūrī sī kahānī rah ga.ī

ab tasavvur kī nazar se dekh letā huuñ 'zahīn'

is javāñ jaipūr ko jis meñ javānī rah ga.ī

karwan-e-umr-e-rafta ki nishani rah gai

ruh ban kar iztirab-e-jawedani rah gai

ek nuqta par simaT kar zindagani rah gai

naqsh ho kar dil mein un ki mehrbani rah gai

hum bahut aage nikal aae hayat-e-ishq mein

sath thoDi dur chal kar umr-e-fani rah gai

apni surat dekh kar teri haqiqat dekh len

ab yahi ek shakl-e-idrak-e-mani rah gai

aap aa jaen to ho jae ye qissa bhi tamam

zindagi ho kar adhuri si kahani rah gai

ab tasawwur ki nazar se dekh leta hun 'zahin'

is jawan jaipur ko jis mein jawani rah gai