mohabbat ki pahli nazar allah allah

mohabbat kī pahlī nazar allāh allāh

vo tūfān-e-jazb-o-asar allāh allāh

qayāmat thī un kī nazar allāh allāh

na thī mujh ko apnī ḳhabar allāh allāh

ye sar aur tirā sañg-e-dar allāh allāh

muqaddar hai kis auj par allāh allāh

vo aa.e to ik lafz bhī un ke aage

na niklā zban se magar allāh allāh

mire dīda-e-shauq kī un ke ruḳh par

vo me.arāj-e-zauq-e-nazar allāh allāh

use chāñd-sūraj se tashbīh kyā duuñ

jo hai rashk-e-shams-o-qamar allāh allāh

shab-e-va.ada hai aur tasavvur meñ vo haiñ

ka.e jā.iye rāt-bhar allāh allāh

kisī ke vo aariz vo ḳhamdār kākul

udhar allāh allāh idhar allāh allāh

rahī ab na vo be-niyāzī kisī kī

ajab chiiz hai chashm-e-tar allāh allāh

ba-sad nā-murādī murād apnī 'kāmil'

kisī kā ġham-e-mo'tabar allāh allāh

mohabbat ki pahli nazar allah allah

wo tufan-e-jazb-o-asar allah allah

qayamat thi un ki nazar allah allah

na thi mujh ko apnī KHabar allah allah

ye sar aur tera sang-e-dar allah allah

muqaddar hai kis auj par allah allah

wo aae to ek lafz bhi un ke aage

na nikla zban se magar allah allah

mere dida-e-shauq ki un ke ruKH par

wo mearaj-e-zauq-e-nazar allah allah

use chand-suraj se tashbih kya dun

jo hai rashk-e-shams-o-qamar allah allah

shab-e-wada hai aur tasawwur mein wo hain

kae jaiye raat-bhar allah allah

kisi ke wo aariz wo KHamdar kakul

udhar allah allah idhar allah allah

rahi ab na wo be-niyazi kisi ki

ajab chiz hai chashm-e-tar allah allah

ba-sad na-muradi murad apnī 'kaamil'

kisi ka gham-e-mo'tabar allah allah