nigah-e-mast saqi ne banaya mujhko diwana

nigāh-e-mast saaqī ne banāyā mujh ko dīvāna

nirālī chaal hai apnī 'ajab hai haal mastāna

ḳham-e-abrū-e-jānāñ taaq mehrāb-e-’ibādat hai

kahāñ kā'ba kahāñ masjid kahāñ hai dair-o-but-ḳhāna

zuhūr-e-zāt-e-be-chūñ huuñ nahīñ chūñ-o-charā us meñ

ye nukta hai faqīrāna ye mazmūñ hai judā-gāna

na muftī huuñ na qaazī huuñ na 'ālim huuñ na zāhid huuñ

ġhulām-e-chisth huuñ be-shak suḳhan merā hai rindāna

'ḳhalīl' apnā yahī mashrab yahī millat yahī maz.hab

shah-e-ḳhādim kī ulfat meñ misāl-e-sham' jal jaana

nigah-e-mast saqi ne banaya mujh ko diwana

nirali chaal hai apni 'ajab hai haal mastana

KHam-e-abru-e-jaanan taq mehrab-e-’ibaadat hai

kahan ka'ba kahan masjid kahan hai dair-o-but-KHana

zuhur-e-zat-e-be-chun hun nahin chun-o-chara us mein

ye nukta hai faqirana ye mazmun hai juda-gana

na mufti hun na qazi hun na 'alim hun na zahid hun

ghulam-e-chisth hun be-shak suKHan mera hai rindana

'KHalil' apna yahi mashrab yahi millat yahi mazhab

shah-e-KHadim ki ulfat mein misal-e-sham' jal jaana