pas-e-parda tujhe har bazm mein shamil samajhte hain

pas-e-parda tujhe har bazm meñ shāmil samajhte haiñ

koī mahfil ho ham us ko tirī mahfil samajhte haiñ

baḌe hushiyār haiñ vo jin ko sab ġhāfil samajhte haiñ

nazar pahchānte haiñ vo mizāj-e-dil samajhte haiñ

vo ḳhud kāmil haiñ mujh nāqis ko jo kāmil samajhte haiñ

vo husn-e-zan se apnā hī sā merā dil samajhte haiñ

samajhtā hai gunah rindī ko tū ai zāhid-e-ḳhud-bīñ

aur aise zohd ko ham kufr meñ dāḳhil samajhte haiñ

samajhtā hai ġhalat lailā ko lailā qais dīvāna

nazar vaale to lailā ko bhī ik mahmil samajhte haiñ

saḌī dīvāna saudā.ī jo chāhe so kahe duniyā

haqīqat-bīñ magar 'majzūb' ko 'āqil samajhte haiñ

pas-e-parda tujhe har bazm mein shamil samajhte hain

koi mahfil ho hum us ko teri mahfil samajhte hain

baDe hushiyar hain wo jin ko sab ghafil samajhte hain

nazar pahchante hain wo mizaj-e-dil samajhte hain

wo KHud kaamil hain mujh naqis ko jo kaamil samajhte hain

wo husn-e-zan se apna hi sa mera dil samajhte hain

samajhta hai gunah rindi ko tu ai zahid-e-KHud-bin

aur aise zohd ko hum kufr mein daKHil samajhte hain

samajhta hai ghalat laila ko laila qais diwana

nazar wale to laila ko bhi ek mahmil samajhte hain

saDi diwana saudai jo chahe so kahe duniya

haqiqat-bin magar 'majzub' ko 'aqil samajhte hain