ye zulf-e-butan ka giraftar main hun

ye zulf-e-butāñ kā giraftār maiñ huuñ

ye bīmār chashmoñ kā bīmār maiñ huuñ

kidhar bahkī phirtī hai ai be-kasī tū

tirī jins kā yaañ ḳharīdār maiñ huuñ

idhar baat kahnā udhar dekh lenā

samajhtā huuñ sab ek ayyār maiñ huuñ

agar mujh se miliye kabhū aib kyā hai

na bad-vaz.a tū hai na bad-kār maiñ huuñ

kiso par balā terī tevrī chaḌhāve

tirī teġh-e-abrū kā afgār maiñ huuñ

sabhī apne jiine se ai 'dard' ḳhush haiñ

agar huuñ to ye ek be-zār maiñ huuñ

ye zulf-e-butan ka giraftar main hun

ye bimar chashmon ka bimar main hun

kidhar bahki phirti hai ai be-kasi tu

teri jins ka yan KHaridar main hun

idhar baat kahna udhar dekh lena

samajhta hun sab ek ayyar main hun

agar mujh se miliye kabhu aib kya hai

na bad-waza tu hai na bad-kar main hun

kiso par bala teri tewri chaDhawe

teri tegh-e-abru ka afgar main hun

sabhi apne jine se ai 'dard' KHush hain

agar hun to ye ek be-zar main hun