afsana-e-hayat ka unwan badal gaya

afsāna-e-hayāt kā 'unvāñ badal gayā

duniyā-e-imbisāt kā sāmāñ badal gayā

gulshan bhī aur bulbul-o-gul bhī sahī magar

apnī nazar meñ daur-e-bahārāñ badal gayā

ḳhud-ġharziyoñ ke chehre se uTh ne lagī naqāb

goyā ke rañg-e-zulf-e-pareshāñ badal gayā

sāhil kahāñ nasīb safīne kī ḳhair ho

maujoñ kā rañg 'ālam-e-tūfāñ badal gayā

kyuuñ baḌh ga.ī haiñ dhaḌkaneñ dil kī batā.iye

kyā aaj zauq-e-chashm-e-pashemāñ badal gayā

mai-kash vahī hai mai bhī vahī mai-kada vahī

saaqī kā rañg maslak-e-rindāñ badal gayā

kal tak jo mere qalb kā ā.īna-sāz thā

vo ā.īne meñ sūrat-e-hairāñ badal gayā

zinda rahegā murdoñ kī mānind dā.imī

'nāzir' kī ab hayāt kā 'unvāñ badal gayā

afsana-e-hayat ka 'unwan badal gaya

duniya-e-imbisat ka saman badal gaya

gulshan bhi aur bulbul-o-gul bhi sahi magar

apni nazar mein daur-e-bahaaran badal gaya

KHud-gharziyon ke chehre se uTh ne lagi naqab

goya ke rang-e-zulf-e-pareshan badal gaya

sahil kahan nasib safine ki KHair ho

maujon ka rang 'alam-e-tufan badal gaya

kyun baDh gai hain dhaDkanen dil ki bataiye

kya aaj zauq-e-chashm-e-pasheman badal gaya

mai-kash wahi hai mai bhi wahi mai-kada wahi

saqi ka rang maslak-e-rindan badal gaya

kal tak jo mere qalb ka aaina-saz tha

wo aaine mein surat-e-hairan badal gaya

zinda rahega murdon ki manind daimi

'nazir' ki ab hayat ka 'unwan badal gaya