tera sani koi hua nahin tera husn husn-e-kamal hai

terā saanī koī huā nahīñ terā husn husn-e-kamāl hai

na jahāñ meñ terī nazīr hai na jahāñ meñ terī misāl hai

vahī apnī manzileñ pā gayā tere ishq meñ jo fanā huā

jise ishq terā milā use koī rañj hai na malāl hai

ye kisī kā mujh pe huā karam mere sāmne hai mirā sanam

mere dil ke ḳhāne meñ har ghaḌī terī yaad terā ḳhayāl hai

tu hī justujū hai junūn hai tuhī chain hai tu sukūn hai

mujhe koī tujh se judā kare ye bhalā kisī kī majāl hai

tere dam se hai merī zindagī terā ishq hai merī bandagī

tere zikr-o-fikr ko chhoḌ kar mujhe ek pal bhī muhāl hai

koī ġham bhī dil kā ayaañ nahīñ mujhe koī fikr-e-jahāñ nahīñ

merī aarzū kā hasīñ chaman terī chāhatoñ se bahāl hai

tere ghar se duur na rah sakūñ maiñ 'shāyāñ' ye bhī na kah sakūñ

isī ġham se dil meñ hai bekalī isī ġham se dil meñ malāl hai

tera sani koi hua nahin tera husn husn-e-kamal hai

na jahan mein teri nazir hai na jahan mein teri misal hai

wahi apni manzilen pa gaya tere ishq mein jo fana hua

jise ishq tera mila use koi ranj hai na malal hai

ye kisi ka mujh pe hua karam mere samne hai mera sanam

mere dil ke KHane mein har ghaDi teri yaad tera KHayal hai

tu hi justuju hai junun hai tuhi chain hai tu sukun hai

mujhe koi tujh se juda kare ye bhala kisi ki majal hai

tere dam se hai meri zindagi tera ishq hai meri bandagi

tere zikr-o-fikr ko chhoD kar mujhe ek pal bhi muhaal hai

koi gham bhi dil ka ayan nahin mujhe koi fikr-e-jahan nahin

meri aarzu ka hasin chaman teri chahaton se bahaal hai

tere ghar se dur na rah sakun main 'shayan' ye bhi na kah sakun

isi gham se dil mein hai bekali isi gham se dil mein malal hai