kaho yahan nazar nazar mein ain shin qaf hai

kaho yahāñ nazar nazar meñ ain shiin qaaf hai

har ek ke dil-o-jigar meñ ain shiin qaaf hai

kisī ke rū-e-kHūb-tar meñ ain shiin qaaf hai

kisī kī zulf tā-kamar meñ ain shiin qaaf hai

jo husn-e-dil-fareb ho to ishq bhī hai be-asar

vagarna husn-e-mo'atabar meñ ain shiin qaaf hai

jo raah se bhaTak ga.e vo manziloñ se duur haiñ

thakāvatoñ ke is safar meñ ain shiin qaaf hai

kisī ko zindagī milī kisī ko maut mil ga.ī

patā chalā ke har ḳhabar meñ ain shiin qaaf hai

dhaḌak rahā hai zor se to kuchh to baat hai zarūr

ke dil ke dard-e-muntashir meñ ain shiin qaaf hai

'hasan' vo ham se pūchhte haiñ āñsuoñ kā falsafa

huzūr merī chashm-e-tar meñ ain shiin qaaf hai

kaho yahan nazar nazar mein ain shin qaf hai

har ek ke dil-o-jigar mein ain shin qaf hai

kisi ke ru-e-kHub-tar mein ain shin qaf hai

kisi ki zulf ta-kamar mein ain shin qaf hai

jo husn-e-dil-fareb ho to ishq bhi hai be-asar

wagarna husn-e-mo'atabar mein ain shin qaf hai

jo rah se bhaTak gae wo manzilon se dur hain

thakawaton ke is safar mein ain shin qaf hai

kisi ko zindagi mili kisi ko maut mil gai

pata chala ke har KHabar mein ain shin qaf hai

dhaDak raha hai zor se to kuchh to baat hai zarur

ke dil ke dard-e-muntashir mein ain shin qaf hai

'hasan' wo hum se puchhte hain aansuon ka falsafa

huzur meri chashm-e-tar mein ain shin qaf hai