’ashiq-e-zulf-o-ruKH-e-dildar aankhen ho gain

’āshiq-e-zulf-o-ruḳh-e-dildār āñkheñ ho ga.iiñ

mubtilā-e-kāfir-o-dīñdār āñkheñ ho ga.iiñ

hai tasavvur bas-ki āñkhoñ meñ ḳhat-e-ruḳhsār kā

ā.īne kī tarah jauhar-dār āñkheñ ho ga.iiñ

ai but-e-kāfir hai bas be-’aib zaat allāh kī

lab tire 'iisā hue bīmār āñkheñ ho ga.iiñ

vo to haiñ chashm-e-suḳhan go gar nahīñ hai ik dahan

chup na rahiye qābil-e-guftār āñkheñ ho ga.iiñ

sāqī-o-mīnā-o-sāġhar ek aate haiñ nazar

bāda-e-vahdat se kyā sarshār āñkheñ ho ga.iiñ

phir gayā vo aake ab jaage to kyā hāsil 'vazīr'

so ga.e jab baḳht tab bedār āñkheñ ho ga.iiñ

’ashiq-e-zulf-o-ruKH-e-dildar aankhen ho gain

mubtila-e-kafir-o-dindar aankhen ho gain

hai tasawwur bas-ki aankhon mein KHat-e-ruKHsar ka

aaine ki tarah jauhar-dar aankhen ho gain

ai but-e-kafir hai bas be-’aib zat allah ki

lab tere 'isa hue bimar aankhen ho gain

wo to hain chashm-e-suKHan go gar nahin hai ek dahan

chup na rahiye qabil-e-guftar aankhen ho gain

saqi-o-mina-o-saghar ek aate hain nazar

baada-e-wahdat se kya sarshaar aankhen ho gain

phir gaya wo aake ab jage to kya hasil 'wazir'

so gae jab baKHt tab bedar aankhen ho gain