liya jo uski nigahon ne jaeza mera

liyā jo us kī nigāhoñ ne jā.eza merā

to TuuT TuuT gayā ḳhud se rābta merā

samā.atoñ meñ ye kaisī miThās ghultī rahī

tamām-umr rahā talḳh zā.iqa merā

chaTaḳh gayā huuñ maiñ apne hī haath se gir kar

mire hī aks ne toḌā hai aa.ina merā

kiyā gayā thā kabhī mujh ko sañgsār jahāñ

vahīñ lagāyā gayā hai mujassama merā

jabhī to umr se apnī ziyāda lagtā huuñ

baḌā hai mujh se ka.ī saal tajraba merā

adāvatoñ ne mujhe e'timād baḳhshā hai

mohabbatoñ ne to kaaTā hai rāsta merā

maiñ apne ghar meñ huuñ ghar se ga.e huoñ kī tarah

mire hī sāmne hotā hai tazkira merā

maiñ luT gayā huuñ 'muzaffar' hayāt ke hāthoñ

sunegī kis kī adālat muqaddama merā

liya jo us ki nigahon ne jaeza mera

to TuT TuT gaya KHud se rabta mera

samaaton mein ye kaisi miThas ghulti rahi

tamam-umr raha talKH zaiqa mera

chaTaKH gaya hun main apne hi hath se gir kar

mere hi aks ne toDa hai aaina mera

kiya gaya tha kabhi mujh ko sangsar jahan

wahin lagaya gaya hai mujassama mera

jabhi to umr se apni ziyaada lagta hun

baDa hai mujh se kai sal tajraba mera

adawaton ne mujhe e'timad baKHsha hai

mohabbaton ne to kaTa hai rasta mera

main apne ghar mein hun ghar se gae huon ki tarah

mere hi samne hota hai tazkira mera

main luT gaya hun 'muzaffar' hayat ke hathon

sunegi kis ki adalat muqaddama mera