mahfil ka ye andaz kahan wo hain kahan main

mahfil kā ye andāz kahāñ vo haiñ kahāñ maiñ

duniyā ko ḳhabar hogī jo kholūñgā zabāñ maiñ

chāho to ham-āhañg karūñ dil se zabāñ maiñ

kuchh arz karūñ jaan kī pā.ūñ jo amaañ maiñ

hālāt-e-ġham-e-ishq nahīñ zikr ke qābil

sunte haiñ agar aap to karatā huuñ bayāñ maiñ

zarre ko bhī ḳhurshed se nisbat sahī phir bhī

sach baat magar ye hai kahāñ aap kahāñ maiñ

bhūle se bhī añgḌā.ī ab aatī nahīñ mujh ko

ai chashm-e-zamāna kabhī hotā thā javāñ maiñ

suntā huuñ baḌī der se saaqī kī burā.ī

ab khīñchūñgā vaa.iz tirī gaddī se zabāñ maiñ

saa.e kī tarah saath nazar ā.ūñgā sarkār

jaanā hai kahāñ mujh ko jahāñ aap vahāñ maiñ

ab ḳhud hī 'nasīr' uTh ke chalā jā.ūñ to achchhā

is anjuman-e-nāz meñ huuñ bār-e-garāñ maiñ

mahfil ka ye andaz kahan wo hain kahan main

duniya ko KHabar hogi jo kholunga zaban main

chaho to ham-ahang karun dil se zaban main

kuchh arz karun jaan ki paun jo aman main

haalat-e-gham-e-ishq nahin zikr ke qabil

sunte hain agar aap to karata hun bayan main

zarre ko bhi KHurshed se nisbat sahi phir bhi

sach baat magar ye hai kahan aap kahan main

bhule se bhi angDai ab aati nahin mujh ko

ai chashm-e-zamana kabhi hota tha jawan main

sunta hun baDi der se saqi ki burai

ab khinchunga waiz teri gaddi se zaban main

sae ki tarah sath nazar aaunga sarkar

jaana hai kahan mujh ko jahan aap wahan main

ab KHud hi 'nasir' uTh ke chala jaun to achchha

is anjuman-e-naz mein hun bar-e-garan main