اس شہرِ بے خطا میں خطاوار میں ہی ہوں

اس شہرِ بے خطا میں خطاوار میں ہی ہوں

یعنی گلوں کے بیچ میں اک خار میں ہی ہوں

لوٹا گیا تھا کل جو سرِ راہ قافلہ

اس قافلے کا قافلہ سالار میں ہی ہوں

سچ بولنے کے جرم میں جس کو سزا ملی

دیکھو و ہ خوش نصیب گنہگار میں ہی ہوں

اہلِ وفا تو پہلے بھی چڑھتے تھے دار پر

آج اس متاعِ حق کا طلبگار میں ہی ہوں

اف تک نہ کی ہو جس نے محبت کی راہ میں

روتے ہیں جس پر اب در و دیوار میں ہی ہوں

دیکھا ہے جس نے دورِ حوادث قریب سے

پتھرا گئی جو نرگس بیمار میں ہی ہوں

لیتا ہوں رب کا نام مصیبت میں آن کر

دیر و حرم کے بیچ گرفتار میں ہی ہوں

عالمؔ خدا کے واسطے کہہ دو جو دل میں ہے

بزمِ سخن میں آج کا سردار میں ہی ہوں