chashm-e-mastan se hai guman kuchh aur

chashm-e-mastāñ se hai gumāñ kuchh aur

zulf-e-pechāñ se hai gumāñ kuchh aur

baat karnā bhī yaar se mushkil

lab-e-jumbāñ se hai gumāñ kuchh aur

ek hujra meñ gar haiñ bāham do

ham-nashīnāñ se hai gumāñ kuchh aur

maiñ ne samjhā thā jaama tan ye hijāb

vasl-e-'uryāñ se hai gumāñ kuchh aur

dil-e-āhū na daam meñ band ho

in ġhazālāñ se hai gumāñ kuchh aur

chashm-e-'āshiq kā qatra durr-e-yatīm

abr-e-naisāñ se hai gumāñ kuchh aur

sar se pā tak barahna huuñ pur-'aib

'aib-e-poshāñ se hai gumāñ kuchh aur

nafs-e-ammāra mutma.inna hai ye

nek-bakHtiyāñ se hai gumāñ kuchh aur

mere yūsuf tū siina se lag jā

ḳhāksārāñ se hai gumāñ kuchh aur

ek bosa kā huuñ tere ḳhvāhāñ

bas raqībāñ se hai gumāñ kuchh aur

shab-e-pur-kor kī haiñ āñkheñ band

mehr-e-tābāñ se hai gumāñ kuchh aur

zarf jaisā hai rañg vaisā hai

'aam ḳhāsāñ se hai gumāñ kuchh aur

vaqt-e-tauba hai phir na āvegā

shān-e-shāhāñ se hai gumāñ kuchh aur

maiñ ne samjhā thā bo'd ’ain-o-qurb

shāh-e-jīlāñ se hai gumāñ kuchh aur

misl ġhuncha ke ho gayā ḳhāmosh

gul-e-ḳhandāñ se hai gumāñ kuchh aur

rahnumā rahbar haiñ miskīñ shaah

hāl-e-rindāñ se hai gumāñ kuchh aur

husn-e-zan aaj hai terā 'mahmūd'

jān-e-jānāñ se hai gumāñ kuchh aur

chashm-e-mastan se hai guman kuchh aur

zulf-e-pechan se hai guman kuchh aur

baat karna bhi yar se mushkil

lab-e-jumban se hai guman kuchh aur

ek hujra mein gar hain baham do

ham-nashinan se hai guman kuchh aur

main ne samjha tha jama tan ye hijab

wasl-e-'uryan se hai guman kuchh aur

dil-e-ahu na dam mein band ho

in ghazalan se hai guman kuchh aur

chashm-e-'ashiq ka qatra durr-e-yatim

abr-e-naisan se hai guman kuchh aur

sar se pa tak barahna hun pur-'aib

'aib-e-poshan se hai guman kuchh aur

nafs-e-ammara mutmainna hai ye

nek-bakHtiyan se hai guman kuchh aur

mere yusuf tu sina se lag ja

KHaksaran se hai guman kuchh aur

ek bosa ka hun tere KHwahan

bas raqiban se hai guman kuchh aur

shab-e-pur-kor ki hain aankhen band

mehr-e-taban se hai guman kuchh aur

zarf jaisa hai rang waisa hai

'am KHasan se hai guman kuchh aur

waqt-e-tauba hai phir na aawega

shan-e-shahan se hai guman kuchh aur

main ne samjha tha bo'd ’ain-o-qurb

shah-e-jilan se hai guman kuchh aur

misl ghuncha ke ho gaya KHamosh

gul-e-KHandan se hai guman kuchh aur

rahnuma rahbar hain miskin shah

haal-e-rindan se hai guman kuchh aur

husn-e-zan aaj hai tera 'mahmud'

jaan-e-jaanan se hai guman kuchh aur