mere aaDe bhanwar mein rahmat-e-parwardigar aai

mire aaḌe bhañvar meñ rahmat-e-parvardigār aa.ī

mirī kashtī kināre kī taraf be-iḳhtiyār aa.ī

jahāñ pā-e-talab kuchh Dagmagā.e rāh-e-ulfat meñ

vahīñ par dil pukār uTThā vo un kī rah-guzar aa.ī

na.e 'unvān se sab ko kisī kā muntazir paayā

jo chiiz aa.ī zamāne meñ ḳharāb-e-intizār aa.ī

ḳhas-o-ḳhāshāk kā ik ghar thā aur ik nā-tavāñ ham the

nasheman kī taraf kyuuñ barq itnī be-qarār aa.ī

mohabbat ne sukūñ luuTā mohabbat ne sukūñ baḳhshā

mohabbat hī se dil meñ tāqat-e-sabr-o-qarār aa.ī

ġham-e-ulfat ġham-e-furqat ġham-e-duniyā ġham-e-'uqbā

jo baat aa.ī hamārī zindagī meñ yādgār aa.ī

ujaḌ kar dil kī bastī phir na basne paa.ī ai 'mai-kash'

hazāroñ baar gulshan meñ ḳhizāñ aa.ī bahār aa.ī

mere aaDe bhanwar mein rahmat-e-parwardigar aai

meri kashti kinare ki taraf be-iKHtiyar aai

jahan pa-e-talab kuchh Dagmagae rah-e-ulfat mein

wahin par dil pukar uTTha wo un ki rah-guzar aai

nae 'unwan se sab ko kisi ka muntazir paya

jo chiz aai zamane mein KHarab-e-intizar aai

KHas-o-KHashak ka ek ghar tha aur ek na-tawan hum the

nasheman ki taraf kyun barq itni be-qarar aai

mohabbat ne sukun luTa mohabbat ne sukun baKHsha

mohabbat hi se dil mein taqat-e-sabr-o-qarar aai

gham-e-ulfat gham-e-furqat gham-e-duniya gham-e-'uqba

jo baat aai hamari zindagi mein yaadgar aai

ujaD kar dil ki basti phir na basne pai ai 'mai-kash'

hazaron bar gulshan mein KHizan aai bahaar aai