mera alam alam nahin meri KHushi KHushi nahin

merā alam alam nahīñ merī ḳhushī ḳhushī nahīñ

sāmne tū agar nahīñ zindagī zindagī nahīñ

nāsehā aa.egā tujhe lutf na lutf-e-ḳhās kā

terī nigāh meñ agar husn kī raushnī nahīñ

aah na kar jigar jalā apnī nazar nazar banā

chāra-e-dard-e-kHās hai 'ishq fusūñ-garī nahīñ

khul na sake raaz kuchh tujh par kamāl-e-'ishq kā

har-har nafs tujhe agar 'ishq meñ bekalī nahīñ

dair pahuñch haram ko jā sar-ba-sujūd ho to kyā

dil ko tire jo khoj hai khoj vo dil lagī nahīñ

terā ḳhayāl terī yaad terī talab ba-qaid-e-hosh

banda-e-'ishq ke liye khel hai bandagī nahīñ

ham ne qubūl bār-hā dekh liyā parakh liyā

daatā husn ke la.al par faiz kī kuchh kamī nahīñ

mera alam alam nahin meri KHushi KHushi nahin

samne tu agar nahin zindagi zindagi nahin

naseha aaega tujhe lutf na lutf-e-KHas ka

teri nigah mein agar husn ki raushni nahin

aah na kar jigar jala apni nazar nazar bana

chaara-e-dard-e-kHas hai 'ishq fusun-gari nahin

khul na sake raaz kuchh tujh par kamal-e-'ishq ka

har-har nafs tujhe agar 'ishq mein bekali nahin

dair pahunch haram ko ja sar-ba-sujud ho to kya

dil ko tere jo khoj hai khoj wo dil lagi nahin

tera KHayal teri yaad teri talab ba-qaid-e-hosh

banda-e-'ishq ke liye khel hai bandagi nahin

hum ne qubul bar-ha dekh liya parakh liya

data husn ke lal par faiz ki kuchh kami nahin