kabhi puchha na ai sajan jo kya tujh par guzarti hai

kabhī pūchhā na ai sājan jo kyā tujh par guzartī hai

terī furqat se ai pyāre na jiitī hai na martī hai

na shab ko niiñd aatī hai na din ko chain hai mujh ko

jo miqrāz-e-mohabbat kī mere dil ko katartī hai

jalānā ḳhaak kar denā terī ye be-niyāzī hai

miyāñ jaano na jaano tum magar ye naaz kartī hai

sanam tere liye maiñ ne hazāroñ Thokareñ khā.īñ

nahīñ tujh bin kahīñ apnī tab.a aajiz Thahartī hai

rulānā muskurānā dil jalānā muñh chhipā lenā

burī qismat merī pyāre bhalā kyūñ-kar sañvartī hai

hasīnoñ kā kahīñ jamghaT jo ho merī balā jaane

nahīñ tujh bin parī par nazar merī Thahartī hai

nahīñ parvāh 'mīrāñ' shaah mujhe dozaḳh-o-jannat kī

va-lekin be-niyāzī se tabī.at merī Dartī hai

kabhi puchha na ai sajan jo kya tujh par guzarti hai

teri furqat se ai pyare na jiti hai na marti hai

na shab ko nind aati hai na din ko chain hai mujh ko

jo miqraaz-e-mohabbat ki mere dil ko katarti hai

jalana KHak kar dena teri ye be-niyazi hai

miyan jaano na jaano tum magar ye naz karti hai

sanam tere liye main ne hazaron Thokaren khain

nahin tujh bin kahin apni taba aajiz Thaharti hai

rulana muskurana dil jalana munh chhipa lena

buri qismat meri pyare bhala kyun-kar sanwarti hai

hasinon ka kahin jamghaT jo ho meri bala jaane

nahin tujh bin pari par nazar meri Thahartī hai

nahin parwah 'miran' shah mujhe dozaKH-o-jannat ki

wa-lekin be-niyazi se tabiat meri Darti hai