gosha-e-chashm mein ashk-e-dar nayab liye

gosha-e-chashm meñ ashk-e-dar nāyāb liye

sāz-e-ḳhāmosh pe baiThe haiñ ye mizrāb liye

hai koī mahv-e-taḳhayyul pa.e sahn-e-gulshan

mast āñkhoñ meñ javānī ke hasīñ ḳhvāb liye

hai subuk-rau to har ik mauj-e-tabassum lekin

apne dāman meñ ye qatra bhī hai sailāb liye

mā.il-e-dā’vat-e-nazzāra har ik mast-e-ḳhirām

suñbuleñ zulf meñ sau halqa-e-gardāb liye

muzda ai zamzama sanjān-e-surūr-o-mastī

sāġhar-e-chashm hai phir aaj mai-e-nāb liye

muddatoñ qais ko phirtā rahā sahrā-sahrā

pā-piyāda tan-e-tanhā dil-e-betāb liye

phir tirī bazm meñ hotā hai gul-afshāñ 'shādāb'

dil meñ zaḳhmoñ ke shagufta gul-e-shādāb liye

gosha-e-chashm mein ashk-e-dar nayab liye

saz-e-KHamosh pe baiThe hain ye mizrab liye

hai koi mahw-e-taKHayyul pae sahn-e-gulshan

mast aankhon mein jawani ke hasin KHwab liye

hai subuk-rau to har ek mauj-e-tabassum lekin

apne daman mein ye qatra bhi hai sailab liye

mail-e-da’wat-e-nazzara har ek mast-e-KHiram

sunbulen zulf mein sau halqa-e-gardab liye

muzda ai zamzama sanjaan-e-surur-o-masti

saghar-e-chashm hai phir aaj mai-e-nab liye

muddaton qais ko phirta raha sahra-sahra

pa-piyaada tan-e-tanha dil-e-betab liye

phir teri bazm mein hota hai gul-afshan 'shadab'

dil mein zaKHmon ke shagufta gul-e-shadab liye